Miroslav Vitous & Emil Viklický

Miroslav Vitouš hain zen birtuosoa kontrabaxua jotzen, ezen musika-kritikariek zioten Scott LaFaro, Dave Holland… artisten parekoa zela. Adibide bat “Now He Sings, Now He Sobs” (1968) bilduma da: erritmoaren zentzu boteretsua, ildo berritzaileak eta, inprobisatzaile moduan, abiadura eta bizitasun paregabeak erakutsi zituen.

Emil Viklický nazioarteko talde ugarirekin aritu izan da pianista gisa mundutik zehar jotzen. Konpositore-jardunean, mirespen handia eragin du sintesia sortu duelako jazz modernoaren adierazpen-osagaiekin eta Moraviako folk-musikaren doinu zein tonalitateekin.